Hos 8 | CYM | STEP | Canwch y corn hwrdd ! Rhybuddiwch y bobl! Mae eryr yn hofran uwch teml yr Arglwydd . Maen nhw wedi torri amodau'r ymrwymiad gyda mi, ac wedi gwrthryfela yn erbyn fy nghyfraith.

Hosea 8

Barn Duw ar Israel

1 Canwch y corn hwrdd ^{▼▼8:1 corn hwrdd Hebraeg, “shoffar”}! Rhybuddiwch y bobl!

Mae eryr yn hofran uwch teml yr Arglwydd.
Maen nhw wedi torri amodau'r ymrwymiad gyda mi,
ac wedi gwrthryfela yn erbyn fy nghyfraith.
2 Mae Israel yn galw arna i,
“O Dduw, dŷn ni'n dy gydnabod di!”
3 Ond mae'n rhy hwyr! Mae Israel wedi gwrthod y da ^{▼▼8:3 y da neu yr Un da (sef, Duw).},
a bydd y gelyn yn ei erlyn.
4 Maen nhw wedi dewis brenhinoedd
heb ofyn i mi.
Maen nhw wedi urddo arweinwyr
heb i mi gytuno.
Maen nhw wedi gwneud eilunod
gyda'r arian a'r aur oedd ganddyn nhw –
ffordd dda i ddinistrio'i hunain!
5 Dw i wedi gwrthod tarw Samaria. ^c
Dw i wedi digio'n lân gyda nhw!
Fydd hi ddim yn hir nes i mi eu cosbi nhw,
6 er mai pobl Israel ydyn nhw!
Cafodd y peth hwnnw ei greu gan grefftwr –
nid Duw ydy e!
Felly, bydd tarw Samaria
yn cael ei falu'n ddarnau mân!
7 Maen nhw wedi hau gwynt,
ond byddan nhw'n medi corwynt!
‛Dydy ŷd heb ben ddim yn rhoi blawd.‛
Hyd yn oed petai'n rhoi cnwd,
pobl estron fydd yn ei fwyta.
8 Bydd Israel wedi ei llyncu gan y cenhedloedd;
bydd fel darn o sbwriel wedi ei daflu i ffwrdd.
9 Maen nhw wedi mynd i fyny i Asyria –
fel asyn gwyllt yn crwydro'n unig.
Mae Effraim ^{▼▼8:9 Effraim Effraim oedd prif lwyth teyrnas Israel, ac mae'n aml yn cynrychioli y wlad yn gyfan.} wedi bod yn talu am ei chariadon.
10 Am ei bod nhw wedi talu am gariad y cenhedloedd,
dw i'n mynd i'w casglu nhw i gael eu barnu,
a byddan nhw'n gwywo dan orthrwm y brenin mawr.
11 Er fod Effraim wedi adeiladu allorau i aberthu dros bechod,
maen nhw wedi eu troi yn allorau i bechu!
12 Er fy mod wedi rhoi cyfreithiau manwl iddyn nhw,
maen nhw'n trin y cwbl fel rhywbeth hollol ddieithr!
13 Mae'n nhw'n dod i offrymu aberthau
er mwyn cael bwyta'r cig!
Dydy'r Arglwydd ddim yn eu derbyn nhw!
Yn fuan iawn, bydd yn delio gyda'i pechodau nhw,
ac yn eu cosbi nhw;
byddan nhw'n mynd yn ôl i'r Aifft! ^{▼▼8:13 yn ôl i'r Aifft Darlun o fod yn gaeth unwaith eto.}
14 Mae Israel wedi anghofio'i Chrëwr.
Mae Jwda wedi adeiladu palasau,
a chryfhau ei chaerau amddiffynnol. ^{▼▼8:14 caerau amddiffynnol Roedd eu polisi amddiffyn wedi cymryd lle trystio'r Arglwydd.}
Ond bydda i'n anfon tân i'w threfi,
ac yn llosgi ei phalasau.